Parisi u bë skenë e krijimtarisë shqiptare më 3 tetor, kur GX Fashion Week zhvilloi edicionin e pestë në Musée Banksy, duke bashkuar stilistë të rinj, emra të afirmuar dhe përfaqësues të botës së modës nga vende të ndryshme. Në qendër të këtij edicioni ishte ndërthurja e modës me artin bashkëkohor, teknologjinë dhe identitetin kulturor, ndërsa organizimi u drejtua nga Gentiana Dervishi, me mbështetjen institucionale të Albanian International Fashion Federation (AIFF), Dhomës Shqiptare të Modës.

Pas prezantimit në Palazzo Giureconsulti në Milano, më 28 shtator, GX Fashion Week u zhvendos në kryeqytetin francez, duke zgjedhur një hapësirë artistike që i dha sfilatës një dimension të veçantë. Bashkëpunimi me Haziz Vardar, sipërmarrës dhe producent teatror belg me origjinë shqiptare dhe themelues i Musée Banksy, krijoi mundësinë për një takim mes gjuhës së modës dhe artit urban.

Në mesin e të ftuarve të mbrëmjes ishin Dritan Tola, ambasador i Shqipërisë në Francë, dhe Mehdi Halimi, ambasador i Kosovës. Prania e tyre i dha aktivitetit një dimension përfaqësues, duke vënë në pah rëndësinë e promovimit të krijimtarisë shqiptare në skenat ndërkombëtare.

Një pjesë e rëndësishme e programit iu kushtua stilistëve të rinj shqiptarë dhe institucioneve që kontribuojnë në formimin e tyre profesional. Studentët e La Griffe Academy, nën drejtimin e Estela Konit, prezantuan koleksionin Haute Couture, të ndërtuar rreth marrëdhënies mes njeriut dhe teknologjisë. Përmes kontrasteve mes estetikës futuriste, ngjyrave dhe simboleve të dashurisë e jetës, koleksioni përcolli idenë se përparimi teknologjik nuk mund të zëvendësojë emocionet dhe ndjenjat njerëzore.

Në pasarelë u prezantuan edhe krijime nga stilistë të tjerë shqiptarë, mes tyre Anisa Balika me markën ASSIN, Ermelinda Malqi me BENJAMIN, Xhea Kaba dhe Deti Hoxha me Deti Style. Koleksionet trajtuan tema të ndryshme, nga ndikimi i inteligjencës artificiale në jetën e përditshme, te identiteti njerëzor, eleganca bashkëkohore dhe raporti mes trupit, teknologjisë dhe shprehjes artistike.

Vëmendje morën edhe krijimet e Marsela Grimci Suknit me markën Pendium Sposa, e cila prezantoi koleksionin e nusërisë “Lule Borë”, si dhe stilistit nga Kosova, Etnik Shala, me koleksionin “ARKA”, të frymëzuar nga kujtesa dhe trashëgimia kulturore. Ndërkohë, Xhesika Dëshiri, Enejda Likalla, Ezgi Özalan, Melina Skenduli dhe Maylin Aguirre sollën interpretime të ndryshme të feminitetit, identitetit dhe inovacionit në modë.

Pjesë e aktivitetit ishin edhe studentë e stilistë të formuar në Albanian Design Academy dhe International Fashion Institute “Izet Curi” në Shkup. Krijimet e tyre eksploruan universin kozmik, inteligjencën artificiale, robotikën, natyrën dhe vizionet futuriste, duke dëshmuar larminë e qasjeve krijuese dhe rëndësinë e shkollimit profesional në zhvillimin e brezit të ri.

Mes pjesëmarrësve ishte edhe Nikola Eftimov, pedagog dhe artist maqedonas, i cili prezantoi projektin “DATA FIELD_01”, ku të dhënat dixhitale shndërrohen në elemente të një gjuhe të re vizuale. Në këtë edicion u ndërthurën kështu perspektiva të ndryshme kulturore dhe artistike, duke e kthyer pasarelën në një hapësirë dialogu mes përvojës profesionale dhe ideve të reja.

Organizimi u mbështet nga një ekip ndërkombëtar profesionistësh të modës, komunikimit, stilimit dhe koordinimit të sfilatave. Kontribut dhanë gjithashtu Grand Hôtel Lafayette dhe Centre Culturel des Albanais, ndërsa promovimi i produkteve shqiptare të gastronomisë dhe artizanatit u mbështet nga Ilda Hila, themeluese e MeZemër.com.

Përmes këtij edicioni në Paris, GX Fashion Week synon të zgjerojë bashkëpunimet ndërkombëtare dhe të krijojë më shumë mundësi për talentet e reja. Përfaqësimi i stilistëve shqiptarë në një skenë ndërkombëtare mbetet një mundësi për të promovuar krijimtarinë, formimin profesional dhe identitetin kulturor përtej kufijve.

Burimi: Materiali informues i GX Fashion Week Paris.

Fotografitë: Arjentina Kola, Florian Vervier, Johnny Fusca dhe Claudio Castellano.