Kryetari i Bashkimit Demokratik për Integrim (BDI), Ali Ahmeti, së bashku me përfaqësuesit e Aleancës Kombëtare për Integrim, ka zhvilluar një takim me qytetarët në Gurguricë, ku është diskutuar për vizionin politik për komunën e Bërvenicës dhe programin e kandidatit për kryetar komune, Arkin Jahiji.

Gjatë takimit, Ahmeti theksoi rëndësinë e përfaqësimit dinjitoz dhe përgjegjës të qytetarëve, duke kritikuar mënyrën se si, sipas tij, është trajtuar vullneti i qytetarëve të Bërvenicës në të kaluarën.

“Bërvenica meriton përfaqësim dinjitoz, të denjë dhe të përgjegjshëm”, u shpreh Ahmeti, duke shtuar se çdo vendbanim i komunës meriton një kryetar që mbron interesat e qytetarëve dhe nuk e tjetërson vullnetin e tyre.

Kreu i BDI-së shprehu bindjen se Arkin Jahiji përfaqëson një alternativë premtuese për të ardhmen e komunës, duke vënë në pah vizionin dhe përkushtimin e tij për zhvillimin e Bërvenicës.

“Bërvenica meriton dinjitet, përfaqësim dhe zhvillim!”, përfundoi Ahmeti, duke mbështetur kandidaturën e Arkin Jahijit për kryetar të komunës.