Televizioni publik i Serbisë, RTS, e ka nisur edicionin qendror të lajmeve të enjten mbrëma me një mesazh kërkimfaljeje drejtuar shikuesve, duke shprehur synimin për të rikthyer besimin e publikut në shërbimin publik.

“Ky është hapi i parë drejt rimëkëmbjes së RTS-së dhe një masë e parë kërkimfaljeje për gjithçka që është lënë jashtë në periudhën e kaluar. Na pret shumë punë në përmbajtjen programore, gjithmonë në interes të publikut. Duam ta rikthejmë besimin tuaj”, thuhej në mesazhin e lexuar nga prezantuesi në emër të redaksisë së re të lajmeve.

Mesazhi u transmetua pas vendimit të ushtruesit të detyrës së redaktorit të Programit Informativ, Borivoje Uskokoviq, për të shkarkuar tetë redaktorë të televizionit.

Ndryshimet në RTS vijnë pas dorëheqjes së drejtoreshës së përgjithshme, Manja Grçiq, më 28 tetor. Letra e saj e dorëheqjes u lexua një ditë më pas, gjatë edicionit të dytë të lajmeve.

Zhvillimet në televizionin publik serb pasojnë zgjedhjet parlamentare.

Sipas rezultateve preliminare të Komisionit Republikan të Zgjedhjeve, Lista e Studentëve ka fituar 140 ulëse, ndërsa Partia Përparimtare Serbe (SNS) e ish-presidentit serb, Aleksandar Vuçiq ka siguruar 104 mandate.

Ndryshime të ngjashme janë vërejtur edhe në disa televizione të tjera, të cilat janë kritikuar për raportimin në favor të Vuçiqit.