Një grua 55-vjeçare nga Shkupi është arrestuar nga policia për shkak të dyshimeve të bazuara se ka kryer veprën penale të mashtrimit gjatë një marrëveshjeje për shitblerje të një apartamenti.

Sipas njoftimit të Ministrisë së Punëve të Brendshme (MPB), arrestimi është bërë mbrëmjen e së hënës, rreth orës 21:00, në Aeroportin Ndërkombëtar të Shkupit. E dyshuara, me inicialet V.S.N., akuzohet se ka mashtruar një banor tjetër të Shkupit, 34 vjeç, gjatë procesit të ndërmjetësimit për blerjen e një apartamenti.

Sipas MPB-së, viktima kishte lidhur një marrëveshje noteriale për ndërmjetësim me të dyshuarën dhe i kishte paguar asaj shumën prej 172.732 denarësh. Megjithatë, më vonë ai zbuloi se apartamenti në fjalë tashmë ishte shitur një personi tjetër, duke kuptuar se ishte viktimë e një mashtrimi.

“Pasi të dokumentohet plotësisht rasti, do të ngrihet kallëzim penal përkatës ndaj të dyshuarës”, thuhet në deklaratën zyrtare nga MPB.

Hetimet për rastin janë në vazhdim./Almakpress