Në prag të mbrëmjeve të maturës, Ministria e Punëve të Brendshme (MPB) ka bërë thirrje të qartë dhe të drejtpërdrejtë për të gjithë maturantët që të festojnë me përgjegjësi dhe të shmangin sjelljet që mund të rrezikojnë jetën e tyre dhe të të tjerëve.

Përmes një deklarate për media, MPB thekson se statistikat e trafikut flasin qartë për një rritje të aksidenteve rrugore gjatë natës së maturës, ku shpesh përfshihen të rinj që sapo kanë përfunduar shkollën e mesme.

“Në mbrëmjen e maturës pa makinë, pa konsumuar alkool, pa përdorur lëndë narkotike, pa prishur rendin dhe qetësinë publike”, thuhet në apelin e MPB-së.

Ministria nënvizon se një pjesë e konsiderueshme e të rinjve të përfshirë në aksidente gjatë këtyre ditëve përfundojnë me lëndime të rënda trupore dhe, në raste fatkeqe, humbin jetën.

“Statistikat e trafikut tregojnë se numri i aksidenteve rrugore rritet në ditët kur organizohen festimet e mbrëmjes së maturës. Një pjesë e madhe e të përfshirëve në aksidente trafiku janë të rinj – të diplomuar në shkollën e mesme, të cilët më shpesh përfundojnë me lëndime të rënda trupore, dhe jo rrallë humbasin jetën”, thekson MPB.

Përgjegjësia, sipas MPB-së, nuk bie vetëm mbi të rinjtë, por edhe mbi prindërit, të cilët duhet të tregojnë kujdes të shtuar dhe të mos lejojnë që fëmijët e tyre të shkojnë në mbrëmjen e maturës me makinë.

“Përgjegjësia për sjelljen devijante të disa maturantëve në trafik bie kryesisht mbi të rinjtë, por edhe mbi prindërit e tyre. Mos i lini fëmijët tuaj të shkojnë në mbrëmjen e maturës me makinë. Gabimet në trafik mund të jenë fatale”, thuhet në deklaratë.

MPB ka përsëritur edhe një herë mesazhet kryesore të fushatës së saj ndërgjegjësuese:

“Ndalohet makina në mbrëmjen e maturës!”, “Ndalohet konsumimi i alkoolit!”, “Ndalohet përdorimi i drogës!”, “Ndalohet prishja e rendit publik!”

Ministria u bën thirrje të rinjve të festojnë me mendje të kthjellët dhe të mos e rrezikojnë të ardhmen e tyre për një natë feste./Almakpress