Dorëheqja e deputetit Salim Sulejmani nga Aleanca për Shqiptarët ka shkaktuar reagime të forta politike dhe është cilësuar nga koalicioni opozitar VLEN si një akt i lartë moral dhe dëshmi se shqiptarët nuk shiten për poste politike.
Në një reagim për media, VLEN shpreh zhgënjimin e thellë për vendimin e Arben Taravarit që, sipas tyre, ka zgjedhur të bashkëpunojë me Ali Ahmetin për interesa personale, duke tradhtuar vullnetin e elektoratit shqiptar.
“Veprimi i Arben Taravarit nuk po gjykohet e dënohet vetëm nga subjekti VLEN, si ish-partner koalicioni me të, por edhe nga njerëzit e tij më të afërt. Çdo ditë e më shumë po shtohet numri i të dëshpëruarve për vendimin skandaloz të Taravarit që të shkojë në prehrin e Ahmetit,” thuhet në kumtesën e VLEN-it.
Sipas tyre, dorëheqja e Sulejmanit është vetëm fillimi i një vale më të gjerë dorëheqjesh brenda strukturave të ASH-së. VLEN pretendon se shumica dërrmuese e anëtarësisë dhe funksionarëve të kësaj partie nuk përkrahin afrimin me BDI-në.
“Ish partneri ynë i koalicionit e vulosi edhe njëherë se nuk e ka idenë e udhëheqjes ose menaxhimit të partisë. Ai për më pak se dy vite e dëmtoi aq shumë këtë subjekt, sa nuk ka dëmtuar asnjë parti oponente. Tani, kur dorëheqjet janë të njëpasnjëshme, duket qartë që Taravari do të përfundojë i vetëm në prehrin e Ali Ahmetit”, thekson më tej VLEN.
Duke përmendur integritetin e deputetit Sulejmani dhe të funksionarëve të tjerë që po largohen nga ASH, VLEN e sheh këtë zhvillim si një sinjal të qartë se qytetari shqiptar nuk është “mjet për pazare të ulëta politike”.
“Në ASH ka njerëz të ndershëm e me përgjegjësi morale para elektoratit dhe këto pohime tona i vulosi sot deputeti Sulejmani, si edhe një varg funksionarësh të tjerë, aktivistë e votues, të cilët assesi nuk rreshtohen me të keqen,” thuhet në deklaratë.
VLEN përfundon me paralajmërimin se vendimi i Taravarit do të ketë pasoja të mëdha në skenën politike shqiptare në Maqedoninë e Veriut: “Tërmeti politik do të ndodhë, madje do të jetë aq i fortë, saqë do të dridhen edhe Ahmeti e Taravari.”/Almakpress
