Mbështetja e qytetarëve të Malit të Zi për anëtarësinë në NATO ka rënë me gati 9 për qind krahasuar me marsin e vitit të kaluar, ndërsa numri i kundërshtarëve është rritur me mbi 11 për qind. Këto janë të dhënat e hulumtimit të fundit të Qendrës për Demokraci dhe të Drejta të Njeriut (CEDEM), të realizuar në shtator.

Sipas Aleancës Atlantike të Malit të Zi, rezultatet tregojnë se elementet proruse dhe anti-NATO vazhdojnë të jenë aktive brenda institucioneve dhe strukturave politike të vendit. “Veprimet e tyre synojnë përhapjen e dyshimit, dobësimin e besimit të qytetarëve dhe relativizimin e qëllimeve strategjike të shtetit”, thuhet në reagimin e kësaj organizate për Radion Evropa e Lirë.

Një zyrtar i NATO-s, në koment për REL-in, theksoi se Mali i Zi përballet me “kërcënime të vazhdueshme hibride nga aktorë rusë dhe të huaj”, por vlerësoi bashkëpunimin e ngushtë që Aleanca ruan me Podgoricën. Ai shtoi se arsyet e rënies së mbështetjes janë çështje që i takojnë autoriteteve malazeze për t’u adresuar.

Ministria e Mbrojtjes së Malit të Zi nuk ka dhënë ende koment mbi këto gjetje.