Sjellja e Ministres së Arsimit, Vesna Janevska, ndaj komunikimit shqip të Bilall Kasamit me gazetarët shqiptarë nxiti edhe reagime politike. Koalicioni VLEN vlerëson se mosnjohja e gjuhës shqipe nuk duhet të kalojë në frustrim. Ata shprehin keqardhje për qasjen e ministres duke nënvizuar se qëndrimi i tillë bie ndesh me frymën e respektit dhe bashkëjetesës që siç thonë, duhet ta mishërojë çdo përfaqësues i institucioneve shtetërore.

“Në një shoqëri demokratike dhe multietnike, kur edhe diplomatët e huaj, që qëndrojnë në vendin thonë dy-tri vite, i mësojnë disa fjalë edhe në gjuhën shqipe, të jesh ministër, madje ministër i Arsimit, e të mos dish asnjë fjalë të gjuhës së bashkëqytetarëve shqiptarë e të reagosh ndaj përdorimit të gjuhës shqipe, kjo është vështirë e përthyeshme në terma të bashkëjetesës, qytetarisë dhe respektimit të tjetrit në një shoqëri multigjuhësore. Ndërkaq respekti ndaj gjuhëve që fliten në këtë vend është respekt ndaj qytetarëve dhe ndaj vetë shtetit që i bashkon ata”, thonë nga VLEN.

Por, VMRO-DPMNE nuk mendon kështu. Nga atje thonë shkurt për mediat se ky nuk është aspak frustrim, por respektim i ligjeve.

“Është e nevojshme të respektohet ligji dhe ky nuk është frustrim, por respektim i ligjeve në Maqedoni”, thonë nga VMRO-DPMNE./Alsat.mk