Nga VLEN në një kumtesë për media thonë se me qeverisjen e tyre, universitetet shqiptare po trajtohen siç duhet. Sipas tyre universitetet shqiptare për vite me radhë u trajtuan si institucione të dorës së dytë, të përjashtuara dhe të detyruara të kërkojnë të drejta elementare përmes protestave.

"Kjo u reflektua në vendime selektive dhe zvarritje institucionale. Kur asistentët dhe profesorët e universiteteve shqiptare protestonin për paga dhe dinjitet, BDI zgjodhi zvarritjen dhe justifikimet. U toleruan marrëveshje selektive që i lanë universitetet shqiptare jashtë trajtimit të barabartë dhe prodhuan revoltë, jo zgjidhje. Sot, ajo padrejtësi po korrigjohet falë kryeparlamentarit Afrim Gashi".

"Jo me fjalë, jo me premtime, por me nënshkrim. VLEN po e bën atë që BDI nuk e bëri as kur ishte në kulmin e pushtetit. Kjo marrëveshje është prova më e qartë se dallimi mes VLEN-it dhe BDI-së nuk është retorik, por praktik. BDI i mbajti universitetet shqiptare në pritje, i nxori në protesta dhe i përdori si kartë politike. VLEN po i nxjerr nga pritja, nga padrejtësia dhe nga trajtimi selektiv", thonë nga VLEN, pasi dje Gashi nënshkroi marrëveshje kolektive me sindikatat e pesë universiteteve shtetërore.