Ministrja e Arsimit dhe Shkencës, Vesna Janevska, ka theksuar rëndësinë e investimit në parandalimin e të rinjve nga veset, duke e cilësuar atë si një investim afatgjatë dhe më efikas sesa ndërhyrjet e mëvonshme. Ajo i bëri këto deklarata gjatë një takimi pune me përfaqësuesin rajonal të Zyrës së Kombeve të Bashkuara për Drogën dhe Krimin (UNODC) për Evropën Juglindore, Danillo Rici, si dhe me përfaqësues të UNODC-së në Shkup.

Janevska vlerësoi bashkëpunimin e shkëlqyer me UNODC-në, veçanërisht në fushën e parandalimit dhe forcimit të sistemit arsimor si një faktor kyç në përballimin e sfidave bashkëkohore shoqërore. Në takim u diskutuan aktivitetet e ardhshme, ndryshimet ligjore që lidhen me parandalimin në arsim, si dhe mundësitë për thellimin e bashkëpunimit në kuadër të Programit Rajonal të UNODC-së për Evropën Juglindore 2024–2029.

Takimi konfirmoi interesin e përbashkët për vazhdimin dhe avancimin e bashkëpunimit, me fokus të veçantë në parandalimin përmes edukimit të nxënësve.