Kryeministri Hristijan Mickoski deklaroi se Qeveria do të vazhdojë të mbështesë projektet që burojnë nga nevojat reale të qytetarëve, duke theksuar se interesi i tyre mbetet prioritet kryesor i ekzekutivit.

Gjatë vizitës në Komunën e Kratovës, Mickoski përgëzoi kryetarin e komunës për punën, të cilën e cilësoi si jashtëzakonisht të suksesshme, ndërsa falënderoi edhe këshilltarët komunalë dhe administratën për mbështetjen e vazhdueshme në realizimin e projekteve.

Ai theksoi se prania e tij, e zëvendëskryeministrit, anëtarëve të Qeverisë dhe deputetëve në Kuvend përbën një mesazh të qartë për qytetarët e Kratovës se Qeveria mbetet e përkushtuar në investime që përmirësojnë jetën e përditshme në këtë komunë.

Sipas Mickoskit, disa projekte tashmë po realizohen përmes mjeteve të ridrejtuara nga buxheti qendror drejt komunave, ndërsa ky proces do të vazhdojë edhe në vitet në vijim.