Kryetari i Lidhjes Demokratike të Kosovës (LDK), Lumir Abdixhiku, ka kërkuar rinumërim të plotë të votave në të gjitha qytetet e Kosovës, pas shpërputhjeve të evidentuara në rezultatet e kandidatëve të partive të ndryshme, përfshirë edhe LDK-në, gjatë rinumërimit të disa vendvotimeve.

Në një reagim të publikuar në faqen e tij zyrtare në Facebook, Abdixhiku ka theksuar se tjetërsimi i votës nuk ka ndodhur si pasojë e gabimeve, por si akt i qëllimshëm ndaj kandidatëve të rinj dhe të pastër në politikë.

“Ua tjetërsuan votën. Jo sepse gabuan, por sepse janë të rinj, të pastër dhe nuk u përshtaten atyre që e kanë kthyer politikën në strehë interesi. Kur goditet një i ri në politikë, nuk goditet vetëm një emër; goditet ideja e një gjenerate që beson te e ardhmja”, ka shkruar Abdixhiku.

Ai ka vlerësuar se ajo që po ndodh në disa qytete nuk është rastësi, por rezistencë ndaj reformës dhe ndryshimit.

“Sulmi ndaj emrave të rinj e të pastër është sulm ndaj punës sonë pesëvjeçare dhe ndaj vullnetit të mbështetësve që është shprehur qartë me votë të lirë”, ka theksuar ai.

Abdixhiku ka kërkuar nga institucionet e drejtësisë që të veprojnë pa vonesë dhe pa përjashtim, duke kërkuar përgjegjësi ligjore, përfshirë edhe dënime me burg, për këdo që ka cenuar votën e lirë.

“Komisionerët manipulues kanë emra. Dihen të gjithë. Jepuni atyre dhe porositësve përgjigjen pa hezitim”, ka shkruar kreu i LDK-së.

Në fund, ai ka theksuar se, edhe pse LDK ka më së paku parregullsi krahasuar me subjektet e tjera, kjo e obligon partinë për një përgjegjësi edhe më të madhe në mbrojtje të votës së lirë.