Deputeti Ilir Demiri ka reaguar publikisht ndaj aludimeve dhe kritikave të fundit në lidhje me emrin e tij, duke theksuar se angazhimi i tij politik është i bazuar në parime morale, përgjegjësi personale dhe shërbim ndaj qytetarëve.

Demiri ka deklaruar se politika për të nuk ka qenë kurrë profesion, por mjet shërbimi, duke rikujtuar se rrugëtimi i tij publik ka nisur nga profesioni i mjekut dhe është udhëhequr nga parimi i shërbimit pa dallim ndaj të gjithë qytetarëve. Ai ka theksuar se këtë parim e ka ndjekur në çdo funksion publik që ka ushtruar, nga drejtori i Spitalit Klinik të Tetovës dhe ministër i Shëndetësisë, deri në detyrën aktuale si deputet.

Duke iu referuar debatit për projektin “Safe City”, Demiri ka sqaruar se vota e tij nuk ka qenë vendimtare për miratimin e ligjit dhe se mbështetja e tij për këtë projekt lidhet me rritjen e rendit dhe sigurisë publike. Ai ka mohuar kategorikisht çdo presion politik, duke theksuar se vepron si deputet i pavarur.

Në fund, Demiri ka deklaruar se mbetet i përkushtuar në mbrojtjen e interesave të qytetarëve dhe të komunitetit shqiptar, duke theksuar se do të vazhdojë të veprojë me përgjegjësi morale dhe ndërgjegje të pastër.