Kryetarja e Komunës së Preshevës, Ardita Sinani, ka bërë të ditur se Lugina e Preshevës do të përfitojë 4 milionë euro mbështetje buxhetore nga Qeveria e Kosovës për vitin 2026.

Në një prononcim publik, ajo shprehu mirënjohjen ndaj Kryeministrit të Republikës së Kosovës, Albin Kurti, për vazhdimin dhe rritjen e kësaj mbështetjeje financiare.

“Shpreh mirënjohjen time të thellë ndaj Kryeministrit të Republikës së Kosovës, Albin Kurti, për vazhdimin e mbështetjes buxhetore për Luginën e Preshevës me 4 milionë euro për vitin 2026”, u shpreh Sinani.

Sipas saj, kjo rritje vjen si rezultat i kërkesës institucionale të adresuar nga komuna, e cila është marrë parasysh dhe është reflektuar në vendimmarrje konkrete.

“Kjo është një dëshmi e partneritetit të qëndrueshëm dhe përkushtimit ndaj shqiptarëve të Preshevës, Bujanocit dhe Medvegjës”, theksoi ajo.

Sinani shtoi se falë kësaj mbështetjeje hapen mundësi të reja zhvillimi në fusha kyçe si arsimi, kultura, ekonomia dhe ruajtja e identitetit kombëtar në Luginën e Preshevës.