Një stuhi e fuqishme dimërore ka goditur rëndë Bregun Lindor të Shtetet e Bashkuara të Amerikës, duke sjellë erëra të acarta dhe reshje rekord dëbore që kanë prekur miliona banorë.

Sipas BBC, në disa zona të Rhode Island dhe Massachusetts janë regjistruar deri në 94 centimetra borë. Ndërkohë, Shërbimi Kombëtar i Motit ka paralajmëruar se kushtet e udhëtimit në New York janë pothuajse të pamundura.

Mbi 600 mijë shtëpi dhe biznese kanë mbetur pa energji elektrike, me New Jersey dhe Massachusetts ndër më të goditurat. Paralajmërimet për stuhi dimërore janë shtrirë nga Karolina e Veriut deri në Maine veriore, ndërsa alarme janë lëshuar edhe për pjesë të Kanadasë lindore.

Autoritetet u kanë bërë thirrje qytetarëve të shmangin lëvizjet e panevojshme dhe të respektojnë udhëzimet e emergjencës deri në stabilizimin e situatës.