Ministrja për Europën dhe Punët e Jashtme e Shqipërisë, Elisa Spiropali, e ka nisur vizitën e saj zyrtare në Kosovë me homazhe në Kompleksi Memorial Adem Jashari, në Prekaz.

E shoqëruar nga Zëvendëskryeministri i Parë dhe Ministri për Punët e Jashtme dhe Diasporën i Kosovës, Glauk Konjufca, ajo vendosi kurora lulesh dhe nderoi sakrificën e familjes Jashari, duke e cilësuar atë si themel të shtetit të Kosovës.

Gjatë vizitës, delegacioni u prit në Kullën e Jasharajve nga Rifat Jashari. Spiropali theksoi se kjo kullë mbetet simbol i qëndresës dhe dëshmi e çmimit të lartë të lirisë, një çmim që, sipas saj, është paguar me jetë.

Vizita në Prekaz shënon ndalesën e parë të agjendës zyrtare të Spiropalit në Kosovë, duke vënë theksin te kujtesa historike, respekti institucional dhe forcimi i lidhjeve mes dy vendeve.