Këngëtari legjendar italian Adriano Celentano ka shprehur publikisht vlerësimin e tij për artistin shqiptar Ermal Meta, i cili po konkurron sërish në skenën prestigjioze të Festival di Sanremo.

Në një mesazh mbështetës, Celentano ka komplimentuar Metën për interpretimin e këngës së tij “Stella Stellin”, duke e cilësuar si një nga prurjet më të forta të këtij edicioni. Artistët italianë dhe publiku po e konsiderojnë Metën ndër emrat favoritë për të triumfuar këtë vit.

Në reagimin e tij, Celentano shkruan, “Bravo Ermal, kënga jote është e mrekullueshme dhe e ke kënduar kaq bukur sa që është pothuajse e pamundur të mos fitosh.”

Kjo mbështetje nga një ikonë e muzikës italiane shihet si një vlerësim i madh për Metën, i cili prej vitesh ka ndërtuar një karrierë të suksesshme në Itali, duke u shndërruar në një nga zërat më të vlerësuar të skenës muzikore atje.

Pjesëmarrja e tij e radhës në Sanremo konfirmon jo vetëm vazhdimësinë artistike, por edhe peshën që ai ka fituar në industrinë muzikore italiane, ndërsa publiku pret me interes rezultatin final të festivalit.