Kryetarja e Preshevë, Ardita Sinani, ka njoftuar se është bërë regjistrimi i padisë në Gjykata Evropiane për të Drejtat e Njeriut lidhur me pasivizimin e adresave, duke e cilësuar këtë si një hap të rëndësishëm drejt vendosjes së drejtësisë.

Sipas saj, procesi synon të adresojë një problem që prek shumë familje dhe që, siç thekson ajo, përbën cenim të të drejtave themelore të qytetarëve. Kjo nuk është vetëm një çështje individuale, është një përpjekje për t’i dhënë fund një praktike sistematike që cenon të drejtat themelore të qytetarëve, është shprehur Sinani.

Ajo ka shprehur mirënjohje të veçantë për Teuta Fazliun, duke vlerësuar guximin qytetar dhe gatishmërinë për ta përfaqësuar këtë çështje në emër të familjeve të prekura. Një falënderim ka shkuar edhe për avokatin Drini Grazhdani, për profesionalizmin dhe përkushtimin në ndërtimin juridik të këtij rasti kompleks.

Padia në Strasburg pritet të trajtojë aspektet ligjore të praktikës së pasivizimit të adresave dhe ndikimin e saj në të drejtat civile, në një proces që tashmë kalon në instancën më të lartë evropiane për mbrojtjen e të drejtave të njeriut.