Procesi për zgjedhjen e Presidentit të Kosovës mbetet i bllokuar për shkak të mungesës së numrit të nevojshëm të kandidaturave. Kryetarja e Kuvendit të Kosovës, Albulena Haxhiu, ka bërë të ditur se deri më tani është dorëzuar vetëm një kandidaturë, çka e pamundëson thirrjen e seancës për votim.

Ajo theksoi se procedurat kushtetuese kërkojnë së paku dy kandidatë për të nisur procesin e zgjedhjes së kreut të shtetit. Sipas saj, “Deri më tani kam pranuar vetëm një kandidaturë për president”, ndërsa shtoi se, “Derisa nuk kemi së paku dy kandidatë nuk mund të thërras seancë për zgjedhjen e presidentit”.

Ndërkohë, siç raporton gazetarja e Top Channel, Leonita Bajrami, afati kushtetues për përmbylljen e këtij procesi përfundon më 5 mars, duke e rritur presionin politik mbi subjektet parlamentare.

Haxhiu e cilësoi situatën urgjente, duke deklaruar se, “Aktualisht kemi më pak se 30 orë e kjo e bën akoma më urgjente situatën”, dhe u bëri thirrje deputetëve që të propozojnë edhe një kandidaturë tjetër në mënyrë që të zhbllokohet procesi dhe të respektohen afatet kushtetuese.