Një raketë iraniane u rrëzua nga mbrojtja kundërajrore e NATO teksa kalonte mbi territorin turk në rajonin e Hatai. Është rasti i parë që një raketë iraniane shkel hapësirën ajrore turke dhe aktivizohet mbrojtja e aleancës, ndërsa Ankaraja zyrtare thirri për sqarime ambasadorin e Iranit.

Ministri turk i Mbrojtjes paralajmëroi se nuk do të hezitonte të kundërpërgjigjej ndaj çdo kërcënimi. Është e paqartë nëse bazat amerikane në Turqi ishin në shënjestër, por trajektorja e raketës tregon se objektivat mund të jenë në Mesdheun Lindor.

Sekretari amerikan i Luftës, Pete Hegseth, deklaroi se SHBA dhe Izraeli po ecin drejt fitores dhe se, “Kemi nisur gjuetinë, çmontimin, shkatërrimin dhe demoralizimin e gjithë kapaciteteve të tyre për 4 ditë. Brenda pak ditësh, në më pak se dy javë, dy fuqitë ajrore më të fuqishme të botës do të kenë kontroll të plotë mbi qiellin e Iranit.”

Ngjarja vjen ndërsa mbyllja e Ngushticës së Hormuzit ka ndikuar në prodhimin dhe transportin e naftës nga vendet e Gjirit dhe tregjet botërore, duke shtuar shqetësimet për furnizimin global me energji.