Ministri i Mbrojtjes, Vllado Misajllovski, u takua me Karl Ford, drejtor për planifikim të mbrojtjes në NATO dhe udhëheqës i ekipit të Aleancës që merr pjesë në bisedimet e rregullta vjetore bilaterale për mbrojtjen mes NATO-s dhe Maqedonisë së Veriut.

Pas takimit, Misajllovski theksoi se vendi po vazhdon investimet për modernizimin dhe forcimin e kapaciteteve të Armatës, në përputhje me standardet e Aleancës.

“Vazhdojmë të investojmë në Armatë për të forcuar gatishmërinë e saj luftarake dhe për të përmbushur objektivat e aftësive të NATO-s. Me një Armatë të fortë, ne gjithashtu kontribuojmë në forcimin e sigurisë kolektive të Aleancës. Në kohë sfidash gjeopolitike globale, uniteti dhe aleanca janë mënyra më e mirë për të garantuar sigurinë e rajonit dhe zonën euroatlantike”, është shprehur Misajllovski.