Kryeministri i Kosovës, Albin Kurti, ka deklaruar se presidentja në detyrë Vjosa Osmani nuk është mbështetur për një mandat të dytë pasi nuk do të siguronte kuorumin e nevojshëm në Kuvend.

Kurti tha se Lëvizja Vetëvendosje kishte tentuar të gjente një figurë konsensuale dhe se në procesin e konsultimeve ishte përmendur edhe emri i Glauk Konjufcës.

“Ne jemi përpjekur që ta gjejmë figurën konsensuale dhe shtegun për propozime partiake e nisi PDK-ja. Kur na u tha se mund të japim propozim, erdhëm te emri i Glauk Konjufcës, që mendojmë se ka qenë vendim i duhur. Ne e kemi ditur paraprakisht që as presidentja aktuale, as presidenti potencial nuk na e garantojnë kuorumin”, deklaroi Kurti.

Ai shtoi se situata u reflektua edhe në votimin e fundit në Kuvend, duke theksuar se për këtë arsye është kërkuar bashkëpunim edhe me partitë e tjera parlamentare.