Më 10 mars të vitit 2007 në Vjenë të Austrisë përfunduan pa marrëveshje bisedimet mes delegacioneve të Kosovës dhe Serbisë për statusin përfundimtar të Kosovës. Takimi u zhvillua nën ndërmjetësimin e të dërguarit të Kombeve të Bashkuara për statusin e Kosovës, Martti Ahtisaari.

Në delegacionin e Kosovës morën pjesë liderët e atëhershëm Fatmir Sejdiu, Agim Çeku dhe Kolë Berisha, ndërsa në delegacionin e Serbisë ishin presidenti Boris Tadić, kryeministri Vojislav Koštunica dhe përfaqësues të tjerë të shtetit serb.

Pas përfundimit të bisedimeve, Ahtisaari shprehu keqardhje që palët nuk arritën një marrëveshje për statusin e Kosovës. Ai njoftoi se dokumenti përfundimtar lidhur me këtë çështje do t’i dërgohej Këshillit të Sigurimit të Kombeve të Bashkuara në fund të muajit mars.

Disa ditë më vonë, më 15 mars 2007, bashkëpunëtori i tij Albert Rohan dorëzoi në OKB propozimin e njohur si Plani i Ahtisaarit, i cili parashihte pavarësinë e Kosovës si zgjidhje përfundimtare për statusin e saj.

Burimi: KultPlus.com