Në një deklaratë të fortë për mediat, familja Cani ka reaguar pas vendimit të Gjykatës Kushtetuese që shpalli antikushtetues mbylljen e rrjetit social TikTok. Ata theksojnë se Martini nuk u vra nga aplikacioni, por nga dështimi i institucioneve shqiptare.

“Ky vendim demaskon hipokrizinë e një qeverie që, në vend që të mbante përgjegjësi për dështimet e saj, zgjodhi të përdorte gjakun e djalit tonë si pretekst për censurë dhe manovra politike”, thuhet në reagim.

Familja Cani rendit faktet që sipas tyre çuan në tragjedinë e djalit: mungesa e sigurisë në shkolla, papërgjegjshmëria e institucionit arsimor, dështimi i sistemit shëndetësor dhe politika e qeverisë që u fokusua më shumë tek propaganda sesa tek siguria e fëmijëve.

“Të vërtetat ulëritëse që po vrasin fëmijët tanë janë: sistemi arsimor i falimentuar, papërgjegjshmëria e shkollës, krimet e sistemit shëndetësor dhe propaganda në vend të sigurisë. Mjaft me manipulime! Kërkojmë drejtësi për Martinin dhe për çdo fëmijë tjetër që ra viktimë e këtij sistemi të kalbur”, shprehet familja.