Gjyqtari i Gjykata Kushtetuese e Maqedonisë së Veriut, Osman Kadriu, vlerëson se miratimi i një ligji të posaçëm për këtë institucion mund të jetë zgjidhja për dilemat që shfaqen në vendimmarrje për çështje me interes të lartë.

Ai theksoi se në shumicën e vendeve kjo çështje është e rregulluar me ligj të veçantë, ndërsa në vend vazhdon të mbetet e hapur pavarësisht diskutimeve të shumta.

“Kur Parlamenti do të sjellë ligj të veçantë, unë thellë jam i bindur se me atë ligj Parlamenti do ta rregullojë edhe çështjen e votimit në Gjykatën Kushtetuese. Nuk mundet vallë Gjykata Kushtetuese të vendosë vetëm me shumicë të thjeshtë me 5 anëtarë, ndërsa para saj parashtrohen iniciativa për kontestimin e ligjeve sistemore që sjell Parlamenti”, deklaroi Kadriu.

Sipas tij, vendimet e marra vetëm me shumicë të thjeshtë mund të jenë ligjërisht të vlefshme, por jo domosdoshmërisht legjitime. “Ai vendim vetëm nga aspekti juridik është legal sepse e ka fituar shumicën, por nga aspekti i legjitimitetit të tij nuk është legjitim”, tha Kadriu, duke shtuar se nevojitet një shumicë cilësore për vendime të tilla.

Ai theksoi se nuk është e domosdoshme të zbatohet modeli i Badinterit, por sipas tij duhet të ekzistojë një mekanizëm që garanton shumicë më të lartë dhe përfaqësim më të balancuar.

Ndërkohë, propozimi për vendosjen e mekanizmit të Badinterit në Gjykatën Kushtetuese ka hasur në kundërshtime nga pala maqedonase. Gordana Siljanovska-Davkova është shprehur publikisht kundër kësaj ideje, ndërsa kryetari i Gjykatës Kushtetuese, Darko Kostadinovski, ka deklaruar se nëse ndodh një ndryshim i tillë, atëherë më mirë do të ishte që Gjykata të mbyllej.