Ambasada e Republikës së Shqipërisë në Kanada organizoi një takim virtual me juristë, avokatë dhe profesionistë të tjerë shqiptarë që ushtrojnë aktivitetin e tyre në sektorin e drejtësisë në të gjithë Kanadanë. Ky aktivitet shënoi një hap të rëndësishëm drejt forcimit të bashkëpunimit dhe krijimit të një rrjeti profesional ndërmjet ekspertëve të fushës së ligjit.

Qëllimi i këtij rrjeti është shkëmbimi i njohurive, përvojave dhe praktikave më të mira, duke mundësuar që juristët shqiptarë në diasporë të lidhen më ngushtë me institucionet dhe profesionistët në Shqipëri. Ky rrjet synon gjithashtu të krijojë mundësi të reja për kontributin e diasporës shqiptare në zhvillimin dhe promovimin e shtetit të së drejtës.

Ky takim virtual u prit me entuziazëm nga pjesëmarrësit, të cilët theksuan rëndësinë e forcimit të lidhjeve profesionale dhe shkëmbimit të eksperiencave për të përmirësuar praktikën ligjore dhe qasjen ndaj sfidave të drejtësisë në Kanada dhe jashtë saj. Ambasada ka nënvizuar se iniciativat e tilla janë thelbësore për të ndërtuar një komunitet të bashkuar dhe profesional shqiptar jashtë vendit.