Grupi parlamentar i Frontit Europian ka dorëzuar në Kuvend një rezolutë që synon zbatimin e Ligjit për Përdorimin e Gjuhëve në provimin e jurisprudencës, pas një iniciative të ndërmarrë nga studentët e drejtësisë.

Në këtë dokument theksohet se studentët shqiptarë, megjithëse i ndjekin dhe i përfundojnë studimet në gjuhën shqipe në universitete të akredituara, nuk kanë mundësi ta japin provimin në gjuhën e tyre amtare, një situatë që cilësohet si shkelje e ligjit dhe cenim i parimit kushtetues të barazisë.

Deputetët shqiptarë u bëjnë thirrje institucioneve përkatëse, në veçanti Ministrisë së Drejtësisë dhe Komisionit për Provimin e Jurisprudencës, të ndërmarrin masa të menjëhershme për organizimin e provimit edhe në gjuhën shqipe, duke garantuar trajtim të barabartë dhe respektim të të drejtave gjuhësore për të gjithë kandidatët.