Një ngjarje e rëndë është regjistruar në zonën e Cossombrato pranë Torino, ku një 59-vjeçar shqiptar ka vrarë ish-bashkëshorten dhe partnerin e saj të ri, përpara se të humbiste jetën më pas.

Sipas të dhënave, A.K. jetonte prej rreth 20 vitesh në Itali, njësoj si edhe ish-bashkëshortja e tij D.K. Konflikti mes tyre lidhet me tentativat e përsëritura të burrit për t’u rikthyer në marrëdhënie, të cilat janë refuzuar për shkak të një lidhjeje të re të gruas.

Hetimet paraprake tregojnë se ai i ka sulmuar dy viktimat me një mjet të mprehtë, duke u shkaktuar vdekjen. Më pas është ngjitur në kullën e kështjellës së zonës, ku ka rënë nga lartësia dhe ka humbur jetën në vend.

Autoritetet italiane fillimisht kanë gjetur trupin e autorit, ndërsa pas disa orësh kërkimesh janë zbuluar edhe trupat e dy viktimave në një zonë fushore pranë fshatit.