Presidenti francez Emmanuel Macron i ka bërë thirrje Shteteve të Bashkuara dhe Iranit që të shmangin çdo përshkallëzim të mëtejshëm të situatës në Ngushticën e Hormuzit, pas incidenteve të fundit gjatë fundjavës që kanë rritur shqetësimet për sigurinë në një nga rrugët më të rëndësishme detare në botë.

Gjatë një konference të përbashkët për shtyp me kryeministrin polak Donald Tusk, Macron theksoi se zgjidhja e krizës duhet të vijë vetëm përmes dialogut dhe diplomacisë. “Qëndrimi ynë mbetet i njëjtë. Duhet t’i zgjidhim çështjet përmes diplomacisë. Të gjithë duhet të qetësohen”, u shpreh ai.

Presidenti francez sqaroi gjithashtu se Franca nuk ka qenë objektiv i drejtpërdrejtë i incidenteve, megjithëse një anije kontejnerësh në pronësi të kompanisë franceze CMA CGM u përfshi në ngjarje. Sipas kompanisë, të shtënat e raportuara janë konsideruar si “të shtëna paralajmëruese”, ndërsa ekuipazhi ka dalë i sigurt.

Ngjarjet në Ngushticën e Hormuzit kanë shtuar shqetësimet ndërkombëtare për stabilitetin dhe sigurinë e transportit detar në rajon.