Kryetari i LSDM-së, Venko Filipçe, ka reaguar ashpër ndaj bllokimit të procesit integrues të vendit drejt Bashkimit Evropian, duke e cilësuar këtë situatë si kërcënimin më serioz për të ardhmen e shtetit. Në një seancë ceremoniale të Bordit Qendror, me rastin e 35-vjetorit të partisë, ai theksoi se rruga evropiane po pengohet me qëllim dhe në kundërshtim me interesat kombëtare.

Sipas tij, deklaratat se integrimi mund të zgjasë me dekada janë të pavërteta dhe të dëmshme, duke shtuar, “rruga drejt BE-së është e bllokuar dhe kjo po justifikohet në mënyrë të rreme si mbrojtje e interesave shtetërore”.

Filipçe nënvizoi se orientimi euroatlantik mbetet prioritet absolut për vendin, duke deklaruar, “nuk ka interes më të madh sesa aleancat me BE-në dhe NATO-n”. Ai rikujtoi se LSDM ka marrë vendime të rëndësishme në të kaluarën për të avancuar integrimin, edhe në momente të vështira politike.

Në vijim, ai kritikoi politikat aktuale që, sipas tij, pengojnë këtë proces, duke i cilësuar si anti-evropiane dhe në kundërshtim të drejtpërdrejtë me interesat e qytetarëve. “Turpi është në anën e tyre, kjo është politika e tradhtisë ndaj interesave kombëtare”, u shpreh Filipçe.

Ai paralajmëroi se zvarritja e perspektivës evropiane rrezikon të sjellë stagnim dhe largim të të rinjve, duke theksuar rëndësinë e ndërtimit të një të ardhmeje brenda vendit. Sipas tij, integrimi në BE mbetet çelësi për zhvillim, siguri dhe mirëqenie.