Ministri hungarez për Çështjet Evropiane, János Bóka, ka bërë të ditur se Ukraina mund të rifillojë sot transitin e naftës ruse drejt Hungarisë përmes naftësjellësit Druzhba.

Në një postim në Facebook, Bóka tha se në Bruksel është diskutuar për rikthimin e funksionimit të tubacionit, duke shtuar, “skenari më i mundshëm është që pala ukrainase të njoftojë rifillimin e operacioneve rreth mesditës së së martës”.

Ai sqaroi se pas këtij njoftimi, operatorët do të kontaktojnë Grupin Mol, i cili furnizon rafineritë në Hungari dhe Sllovaki me naftë ruse. Sipas tij, së fundmi kompania ka përdorur edhe rezerva strategjike kombëtare për të siguruar furnizimin.

Furnizimet përmes Druzhba-s janë ndërprerë që nga 27 janari, ndërsa Bóka theksoi se rifillimi i tyre lidhet edhe me zhvillimet politike dhe financiare mes BE-së dhe Ukrainës.

Ai deklaroi, “strategjia hungareze funksionoi, ukrainasit mbaruan paratë para se ne të mbaronim naftën”, duke akuzuar gjithashtu Komisionin Evropian për mungesë të mbrojtjes së sigurisë energjetike të vendit të tij.