Një incident i ri ka tensionuar marrëdhëniet mes Itali dhe Rusi, pasi prezantuesi rus Vladimir Soloviev ka përdorur gjuhë fyese ndaj kryeministres italiane Giorgia Meloni gjatë një emisioni televiziv.

Gjatë programit “Polnyj Kontakt”, ai e përshkroi Melonin me terma të ashpër dhe denigrues, duke shkaktuar reagime të forta në Itali. Sipas raportimit të Corriere della Sera, deklaratat janë cilësuar si të papranueshme dhe të paprecedenta ndaj një lideri shtetëror.

Reagimi i autoriteteve italiane ishte i menjëhershëm. Ministri i Jashtëm Antonio Tajani bëri të ditur se ambasadori rus në Romë është thirrur për sqarime lidhur me deklaratat.

Nga ana e saj, Meloni u përgjigj publikisht, duke deklaruar se propagandistët e regjimit nuk mund të japin mësime për liri apo koherencë, ndërsa shtoi se Italia nuk do të ndryshojë kursin e saj politik dhe do të vazhdojë të ndjekë interesin kombëtar.

Solidaritet ndaj saj shprehu edhe presidenti Sergio Mattarella. Ngjarja ka thelluar më tej tensionet mes dy vendeve, të cilat janë përkeqësuar që nga nisja e luftës në Ukrainë në vitin 2022.