Irani ka deklaruar se është plotësisht i përgatitur për pjesëmarrjen e kombëtares së futbollit në FIFA World Cup 2026, që do të zhvillohet në Meksikë, Kanada dhe SHBA.

Zëdhënësja e qeverisë iraniane, Fatemeh Moharejani, tha për transmetuesin shtetëror Irib se Ministria e Sporteve dhe Rinisë ka përfunduar të gjitha përgatitjet e nevojshme për përfaqësuesen e vendit në turneun më të madh të futbollit botëror.

Ndërkohë, ministri i sporteve, Ahmad Donyamali, ka deklaruar më herët se pjesëmarrja e Iranit mbetet e varur nga vendimi përfundimtar i qeverisë dhe nga kushtet e sigurisë. Ai kishte theksuar se skuadra po përgatitet për grumbullim, por vendimi final do të merret në varësi të situatës dhe garancive për siguri gjatë aktivitetit.

Sipas tij, ekipi parashikohet të hyjë në grumbullim disa ditë para turneut, ndërsa pjesëmarrja do të konfirmohet vetëm nëse plotësohen kushtet e nevojshme organizative dhe të sigurisë.