Në Maqedoninë e Veriut po vazhdon debati për të ardhmen e Qeverisë së Përzhinës, modelit teknik të krijuar me marrëveshje politike. Analistët Petar Arsovski dhe Vladimir Bozhinovski kanë paraqitur qëndrime të ndryshme lidhur me mundësinë e shfuqizimit të këtij mekanizmi dhe mënyrën e rregullimit të periudhës zgjedhore.

Petar Arsovski thekson se ekziston hapësirë për heqjen e qeverisë teknike, por sipas tij kjo duhet të shoqërohet me kufizime të qarta të kompetencave në periudhën parazgjedhore.

“Edhe pse ishte një mekanizëm i domosdoshëm, nuk është një mesazh i mirë për shtetin. Ndoshta është e mençur të mendohet për shfuqizimin e atij formati, por kjo duhet të shkojë paralelisht me kufizimin e kompetencave të ministrave”, u shpreh Arsovski.

Ndërkohë, Vladimir Bozhinovski vlerëson se mungesa e konsensusit politik e bën të vështirë çdo ndryshim institucional, duke shtuar se në vend të një qeverie teknike duhet të forcohen mekanizmat ligjorë për periudhën zgjedhore.

“Tek ne problemi është që shumë vështirë arrihet konsensusi, kritikë për hir të kritikës. Edhe për Qeverinë e Përzhinës konsensusi ishte i imponuar”, tha Bozhinovski.

Burimi: Tv21