Kryeministri i Shqipëria, Edi Rama, ka reaguar pas të shtënave të regjistruara gjatë White House Correspondents' Dinner në Washington Hilton, duke e cilësuar ngjarjen si një sulm ndaj vlerave demokratike.

Në një postim në rrjetin social X, Rama shprehu shqetësimin për incidentin dhe theksoi se “një sulm si ky godet lirinë dhe mënyrën tonë demokratike të jetesës kudo”, ndërsa shtoi se e dënon fuqishëm aktin.

Ai gjithashtu u shpreh i lehtësuar që të pranishmit në aktivitet, përfshirë edhe presidentin amerikan, janë në gjendje të mirë, duke deklaruar se “ndihem i lehtësuar që @POTUS dhe të gjithë të pranishmit janë shëndoshë e mirë”.

Ngjarja ndodhi në momentin kur darka kishte nisur, ndërsa në hyrje të sallës u dëgjuan të shtëna që shkaktuan panik. Të pranishmit u shtrinë në dysheme, ndërsa Melania Trump dhe presidenti u larguan nga forcat e sigurisë.

Agjentët e sigurisë ndërhynë menjëherë dhe evakuuan të pranishmit nga ambienti, ndërsa autori i dyshuar u arrestua në vendngjarje. Hetimet për zbardhjen e plotë të rastit vijojnë.