Kryetari i Bashkisë së Tiranës, Erion Veliaj, i cili ndodhet në paraburgim, i është drejtuar përfaqësuesve të huaj në Shqipëri me kërkesë për të ndjekur nga afër seancën e 8 majit në Gjykatën Administrative dhe për të siguruar transparencë të plotë në zhvillimin e saj.

Kërkesa është përcjellë përmes firmave ligjore Kasowitz Benson Torres LLP dhe Mishcon de Reya, të cilat kanë kërkuar gjithashtu transmetimin e seancës në mënyrë publike.

Seanca lidhet me shqyrtimin e ligjshmërisë së emërimit të prokurorit Ols Dado, i cili po drejton çështjen penale ndaj Veliajt.

Në qëndrimin e tij, Veliaj pretendon se emërimi i prokurorit nuk është në përputhje me kriteret ligjore, duke ngritur dyshime mbi vlefshmërinë e veprimeve të tij në këtë proces.

Ai paralajmëron se çështja mund të mbyllet mbi baza procedurale pa u shqyrtuar në themel, gjë që sipas tij do të cenonte transparencën dhe parimet e një procesi të rregullt ligjor.

Në dokument përmenden edhe pasoja të procesit, përfshirë paraburgimin, kufizimet në mbrojtje ligjore dhe aksesin në prova, si dhe ndikimin në jetën e tij personale dhe familjare.