Ushtruesja e Detyrës së Presidentes së Kosovës, Albulena Haxhiu, mori pjesë sot në Akademinë Përkujtimore për 27-vjetorin e Masakrës së Studimes në Vushtrri, ku më 2 maj 1999 u vranë 116 civilë shqiptarë.

Në fjalën e saj, Haxhiu tha se brenda vetëm dy orëve në atë ditë tragjike u ndërpre jeta e fëmijëve, grave, burrave dhe të moshuarve, të cilët po largoheshin nga zonat e rrethuara në një kolonë të të dëbuarve.

“116 civilë shqiptarë: fëmijë, të rinj, gra, burra e pleq. Njerëz të paarmatosur… rruga e tyre u ndërpre nga forcat serbe”, u shpreh ajo, duke theksuar se shteti serb kishte përdorur aparatin e tij ushtarak dhe policor si “makineri të spastrimit etnik”.

Ajo shtoi se pas masakrës, dhuna dhe vuajtjet nuk u ndalën, duke përmendur edhe ndarjen e burrave, torturat në burgun e Smrekonicës dhe dëbimin e familjeve drejt Shqipërisë.

Sipas Haxhiut, masakra e Studimes ishte pjesë e një “projekti gjenocidal” që përfshinte edhe krime të tjera në vende si Nabërgjani, Bukoshi, Meja, Krusha dhe Izbica.

“Njerëz të pafajshëm u vranë sepse ishin shqiptarë… sot jetojmë në Republikën e Kosovës sepse ai projekt ka dështuar”, tha ajo.

Haxhiu theksoi se shteti i Kosovës do të jetë pranë familjeve të viktimave jo vetëm në përvjetorë, por edhe në proceset e drejtësisë, duke kërkuar që kriminelët e luftës të mos mbeten të pandëshkuar.

Në përmbyllje, ajo nderoi të gjitha viktimat e luftës në Kosovë, duke theksuar se kujtimi i tyre është themel i lirisë dhe shtetit.