Presidenti i Shqipërisë, Bajram Begaj, ka reaguar pas aksidentit tragjik në Durrës, ku dy fëmijë humbën jetën dhe një tjetër mbeti i plagosur rëndë.

Përmes një postimi në rrjetet sociale, kreu i shtetit shprehu tronditjen e tij për ngjarjen dhe ngushëlloi familjet e viktimave. “I tronditur thellë për aksidentin e tmerrshëm në Durrës, ku humbën jetën dy vogëlushë dhe një tjetër u plagos shumë rëndë”, shkruan Begaj, duke shtuar se lutet për shpirtrat e tyre dhe u qëndron pranë prindërve në këtë dhimbje të madhe.

Ai uroi gjithashtu shërim të shpejtë për fëmijën e plagosur dhe theksoi nevojën për reagim institucional. “Institucionet përgjegjëse të marrin masa për rritjen e sigurisë në qarkullim, të bëjnë një hetim shterues për ngjarjen dhe qytetarët të rrisin përgjegjshmërinë për zbatimin e ligjit”, u shpreh presidenti, duke nënvizuar se jeta dhe siguria e qytetarëve janë të shenjta.