Në Gjykatën Speciale në Hagë janë dorëzuar rreth 200 mijë nënshkrime në mbështetje të ish-krerëve të Ushtrisë Çlirimtare të Kosovës, në një iniciativë që synon të shprehë qëndrimin publik lidhur me procesin gjyqësor ndaj tyre.

Kryetari i Organizatës së Veteranëve të Luftës së UÇK-së, Hysni Gucati, deklaroi se këto nënshkrime përfaqësojnë më shumë se një peticion formal, duke i cilësuar si shprehje të vullnetit qytetar dhe kujtesës kolektive për sakrificën gjatë luftës.

“200 mijë nënshkrimet tregojnë pafajësinë e krerëve të Ushtrisë Çlirimtare të Kosovës, tregojnë se në këtë vend ka pasur një luftë të shenjtë dhe ka qenë një ushtri, e cila është përballur me forca çetnike paramilitare serbe, me ushtrinë dhe policinë e Serbisë ku ne kemi çliruar vendin. Këto 200 mijë shqiptarë tregojnë që këta burra janë të pafajshëm,” u shpreh Gucati.

Ai shtoi se shpreson që gjatë kësaj vere ish-krerët e UÇK-së të rikthehen në Kosovë.

Procesi gjyqësor ndaj katër ish-krerëve të UÇK-së ka nisur më 3 prill 2023, rreth tre vite pas konfirmimit të aktakuzës, ndërkohë që ata vazhdojnë të mbahen në paraburgim në Hagë.