Britania e Madhe ka vendosur të dërgojë anijen luftarake HMS Dragon në Lindjen e Mesme, në kuadër të një operacioni të mundshëm ndërkombëtar për mbrojtjen e anijeve tregtare në Ngushticën e Hormuzit.

Anija ushtarake, e specializuar në mbrojtje ajrore, ishte angazhuar më herët në Mesdheun Lindor, ku kishte marrë pjesë në operacione mbrojtëse pranë Qipros. Vendimi për zhvendosjen e saj vjen në një kohë kur tensionet në Gjirin Persik vazhdojnë të rriten.

Ndërkohë, edhe Franca ka shtuar prezencën ushtarake në rajon, duke vendosur grupin e saj të sulmit me aeroplanmbajtëse në jug të Detit të Kuq. Të dy shtetet po koordinojnë veprimet për garantimin e sigurisë së rrugëve detare dhe mbrojtjen e tregtisë ndërkombëtare.

Ngushtica e Hormuzit konsiderohet një nga korridoret më strategjike për transportin global të energjisë.