Në prag të Ditës Ndërkombëtare të Infermierëve, Forumi i Grave i VLEN-it së bashku me këshilltarën e Lëvizjes Arbëria në Shkup, Sanije Duraku, realizuan një vizitë në Spitalin Obstetrik-Gjinekologjik “Nënë Tereza” në Çair, ku shprehën mirënjohje për infermieret dhe stafin mjekësor për kontributin e tyre të përditshëm në shërbim të qytetarëve. Gjatë vizitës simbolike, përfaqësueset e forumit dhuruan lule si shenjë falënderimi dhe vlerësimi për përkushtimin, sakrificën dhe kujdesin që infermieret ofrojnë ndaj pacientëve, veçanërisht ndaj nënave dhe foshnjeve të sapolindura. Nga Forumi i Grave u theksua se “kjo ditë është një mundësi për të rikujtuar rëndësinë e profesionit të infermierisë dhe kontributin e madh që japin në shëndetin publik”. Drejtoresha e spitalit, Dr. Meral Uzeiri Ferati, falënderoi vizitën duke deklaruar se “ky gjest, sado simbolik, ka një domethënie të madhe për infermieret tona”, duke shtuar se “përkushtimi dhe humanizmi i tyre janë themeli i punës së përditshme”. Ajo theksoi se vlerësimi i këtij profesioni mbetet motivim i rëndësishëm për stafin mjekësor.