Ndërsa Trump lëviz mes kërcënimeve ushtarake dhe premtimeve për armëpushim, iranianët mbeten të rraskapitur dhe të kapluar nga pasiguria. Pavarësisht heqjes së pjesshme të bllokadës së internetit që nisi kur lufta filloi më 28 shkurt, frika nga represioni i brendshëm ka ushqyer pesimizmin.

Saeed, një protestues i cili kërkoi pseudonim për arsye sigurie, shprehu bindjen se rezultati më i keq i mundshëm tashmë kishte ndodhur, "Ekonomia është më keq se sa ishte më 28 dhjetor, kur filluan protestat, dhe, me numrin e bastisjeve, arrestimeve dhe ekzekutimeve çdo ditë, ne kemi mbetur me një regjim të fuqizuar. Jemi vërtet në një situatë shumë të keqe."

Ai shtoi se lufta thelloi edhe ndarjet brenda familjeve, "Disa nga anëtarët më të moshuar të familjes sime duket se mendojnë se ne, protestuesit e rinj, jemi të indoktrinuar dhe kemi turpëruar vendin. Ata besojnë gjithçka që thuhet në televizionin shtetëror dhe nuk e kuptojnë se regjimi ka ekzekutuar të rinj vetëm sepse dolën në protesta."

Protestat që filluan në dhjetor u përballën me shtypje të dhunshme. Mijëra persona raportohet se u vranë, mbi 50 mijë u arrestuan sipas HRANA-s, ndërsa të paktën 226 persona janë ekzekutuar këtë vit sipas IHRNGO-s.

Amir, një biznesmen nga Mashadi, tha se ndihet i poshtëruar, "Ky nuk është armëpushim. Është një ankand i pafund mes SHBA-ve dhe Republikës Islamike mbi jetët tona dhe gjakun tonë."

Noor, pronare e një kafeneje në Teheran, paralajmëron se "pas disa muajsh do të jemi në një ferr të tillë ekonomik sa njerëzit do të rikthehen në rrugë thjesht nga dëshpërimi."

Burimi: The Guardian