Kryetari i LSDM-së, Venko Filipçe, në Kongresin e 32-të Programor të partisë me moton “Shteti yt – mundësia jote”, deklaroi se partia po hyn në një fazë të re të përgjegjësisë politike dhe morale, duke theksuar se synimi nuk është vetëm miratimi i një platforme të re, por rikthimi te vlerat themelore të socialdemokracisë.

Filipçe tha se LSDM-ja duhet të jetë “ndërgjegjja e shtetit, zëri i punës dhe mbrojtja e qytetarëve”, duke nënvizuar se vendit nuk i nevojitet një fjalor i ri partiak, por një zotim i ri moral. Sipas tij, ky zotim duhet të nisë nga përkushtimi ndaj punëtorëve, grave, të rinjve, bujqve, sipërmarrësve të vegjël dhe pensionistëve që përballen me sfida të përditshme ekonomike dhe sociale.

“Sot jemi mbledhur jo vetëm për të votuar një dokument, por për të vendosur nëse LSDM-ja do të bëhet ajo që gjithmonë është dashur të jetë”, deklaroi Filipçe, duke shtuar se partia duhet të tregojë guxim politik në momentet kur qytetarët kanë më së shumti nevojë për mbështetje dhe drejtësi sociale.