Ambasadori i Shqipërisë në Maqedoninë e Veriut, Denion Meidani, ka ndarë përshtypjet nga vizita e 217 studentëve të Universitetit “Nënë Tereza” nga Shkupi në Tiranë, duke e cilësuar këtë përvojë si një dëshmi të qartë të potencialit dhe energjisë së brezit të ri.

Përmes një postimi publik, Meidani tha se dita e kaluar në Tiranë me studentët ishte një moment frymëzues, ndërsa veçoi edhe mikpritjen e ofruar gjatë vizitës. “E diel e bukur në Tiranë me Besarin, 217 studentë të Universitetit ‘Nënë Tereza’ të Shkupit dhe mikpritësin e palodhur, Blendi Gonxhja”, ka shkruar ai.

Ambasadori shqiptar vlerësoi të rinjtë si garanci për zhvillimin dhe perspektivën e rajonit, duke theksuar se “217 arsye për të besuar se e ardhmja e rajonit tonë tashmë është në duar të mira”. Në mesazhin e tij, Meidani ritheksoi se Shqipëria mbetet gjithmonë e hapur për studentët dhe të rinjtë shqiptarë nga Maqedonia e Veriut, duke u shprehur se “Në Shqipërinë tonë, e tuajën, jeni gjithmonë të mirëseardhur!”.