Presidenti i Serbisë, Aleksandar Vuçiç, ka njoftuar të shtunën se do të largohet nga posti i tij brenda pak javësh, hap që do t'i hapë rrugën zgjedhjeve të parakohshme presidenciale dhe parlamentare. Deklarata erdhi në një tubim mbështetësish të Partisë Progresive Serbe në Beograd, ku Vuçiç u shpreh, "do të jem president edhe vetëm për disa javë, pastaj do të jap dorëheqje". Presidenti, që është në pushtet prej 13 vitesh, ka qenë nën presion të vazhdueshëm prej muajsh për shkak të protestave masive kundër qeverisë së tij, të nxitura nga shembja vdekjeprurëse e një strehe në stacionin hekurudhor të Novi Sadit, në nëntor të vitit 2024, ku humbën jetën 16 persona. Lëvizja protestuese, e udhëhequr kryesisht nga studentët, ka vazhduar për një vit e gjysmë, herë pas here e shoqëruar me episode dhune. Vuçiç tha se do të ndihmojë partinë e tij të fitojë zgjedhjet e ardhshme, të cilat fillimisht ishin planifikuar për vitin 2027, por nuk dha asnjë datë konkrete për dorëheqjen apo për shpërndarjen e parlamentit, hap i nevojshëm ligjërisht për thirrjen e zgjedhjeve të parakohshme. Në fjalimin e tij, presidenti akuzoi, pa sjellë prova, qendra pushteti nga jashtë për ndërhyrje në proceset politike të vendit, ndërsa theksoi se Serbia nuk do të hyjë në negociata për statusin e Kosovës, pasi sipas tij kjo çështje është shkruar qartë në Kushtetutë. Njoftimi vjen në prag të Vidovdanit, ditë që shënon për serbët Betejën e Kosovës, kur Vuçiç paralajmëroi gjithashtu një shfaqje ushtarake dhe një stërvitje të planifikuar për të dielën.

Burimi: Evropa e Lirë