Brenda vetëm 24 orëve, mijëra shqiptarë nga vendi dhe diaspora janë bashkuar për të mbështetur financiarisht Altin Hila dhe familjen e tij. Fushata e hapur në GoFundMe ka grumbulluar 115,446 euro, ose 89 për qind të objektivit prej 130 mijë eurosh, falë kontributit të rreth 3.4 mijë donatorëve.

Nisma u krijua pas arrestimit të Hilës gjatë protestës së zhvilluar para Kuvendit. Organizatorët pretendojnë se ai u keqtrajtua nga policia përpara arrestimit, ndërsa theksojnë se familja e tij ndodhet në vështirësi të mëdha ekonomike dhe sociale.

Pamjet e shpërndara në rrjetet sociale, ku Hila kujdeset për djalin e tij me status invaliditeti, kanë ngjallur reagime të shumta dhe kanë nxitur një valë solidariteti. Me ritmin aktual të donacioneve, fushata është shumë pranë arritjes së objektivit të saj.