Drejtoresha e Spitalit Gjinekologjik në Çair mori pjesë në aktivitetin e organizuar nga kryetari i Komunës së Çairit, Izet Mexhiti, ku u prezantua projekti “Çairi në ritmin e shëndetit”, një nismë që synon ta afrojë kujdesin shëndetësor me qytetarët dhe të rrisë ndërgjegjësimin për rëndësinë e parandalimit. Në kuadër të projektit, nga java e ardhshme në objektin e Komunës së Çairit do të organizohen ligjërata publike me pediatër, gjinekologë, mjekë të përgjithshëm dhe specialistë të fushave të ndryshme. Ata do të ndajnë këshilla dhe informacione praktike për ruajtjen e shëndetit dhe promovimin e kontrolleve të rregullta mjekësore. Njëkohësisht, ekipe mjekësore do të vendosen çdo ditë në parqet e Çairit me stenda informuese, ku qytetarët do të kenë mundësi të marrin këshilla shëndetësore, të matin tensionin e gjakut dhe nivelin e sheqerit, si dhe të informohen për rëndësinë e diagnostikimit të hershëm dhe kujdesit të vazhdueshëm për shëndetin.