Kryetari i Komunës së Çairit, Izet Mexhiti, ka pritur një delegacion të përbërë nga përfaqësues të politikës, biznesit dhe institucioneve ndërkombëtare, të udhëhequr nga Dr. Dustin Plantholt, i prezantuar si organizator i Forumit Ekonomik të Davosit. Vizita u zhvillua në kuadër të nismave për forcimin e bashkëpunimit ekonomik me Shtetet e Bashkuara të Amerikës. Gjatë takimit, Mexhiti prezantoi prioritetet dhe projektet zhvillimore të Komunës së Çairit, me fokus te qeverisja lokale, investimet në arsim, kulturë dhe infrastrukturë, si dhe mundësitë për bashkëpunim në fusha me interes të përbashkët. "Besoj se dialogu dhe shkëmbimi i përvojave me partnerë ndërkombëtarë janë një vlerë e shtuar për qeverisjen lokale dhe një mundësi e mirë për të krijuar bashkëpunime që i shërbejnë zhvillimit të vendit tonë", ka deklaruar Mexhiti. Vizita u vlerësua si një mundësi për të zgjeruar bashkëpunimin ndërkombëtar dhe për të promovuar projekte që mbështesin zhvillimin lokal.