Në Gostivar është duke u zhvilluar një aksion i koordinuar i institucioneve kompetente lidhur me rastin e ndotjes së ujit të pijshëm. Sipas informacioneve jozyrtare, me procedurë urgjente janë ndaluar drejtoresha e NP “Komunalec”, Artana Asani, udhëheqësi i Sektorit të Ujësjellësit, Vadedin Dervishi, si dhe drejtori teknik, Leon Nuredini. Burimet bëjnë të ditur se aktivitetet po zhvillohen në koordinim me Prokurorinë Themelore Publike, ndërsa rasti po hetohet fillimisht mbi dyshimet për veprat penale “Ndotja e ujit të pijshëm” dhe “Vepra të rënda kundër mjedisit jetësor dhe natyrës”, sipas Kodit Penal. Ndërkohë, institucionet ende nuk kanë dalë me një njoftim zyrtar për rrjedhën e aksionit, ndërsa pritet që gjatë ditës të publikohen më shumë detaje për masat e ndërmarra. Sipas informacioneve jozyrtare, raporti i Institutit të Shëndetit Publik ka konstatuar baktere fekale koliforme në dy nga katër mostrat e ujit të analizuara, ndërsa në një mostër është evidentuar edhe një përqendrim i rritur i klorit.