New Yorku është kthyer në një skenë të veçantë të modës dhe kulturës amerikane, ku më shumë se 120 flamuj të rinj, të krijuar nga stilistë të njohur, janë vendosur në hapësirat e Rockefeller Center. Instalacioni “United Flags of Fashion” u prezantua më 27 korrik nga Vogue dhe Këshilli i Dizajnerëve të Modës së Amerikës (CFDA), në bashkëpunim me Rockefeller Center dhe America250.
Projekti, i realizuar në kuadër të 250-vjetorit të nënshkrimit të Deklaratës së Pavarësisë së SHBA-së, sjell interpretime të reja artistike të flamujve të 50 shteteve, pesë territoreve amerikane dhe Uashingtonit, D.C. Mbi 100 stilistë kanë përdorur krijimtarinë e tyre për të përcjellë histori, identitet, kulturë dhe simbolikë përmes dizajnit.
Në mesin e emrave pjesëmarrës janë Ralph Lauren, Thom Browne, Tory Burch, Michael Kors, Tommy Hilfiger dhe Vera Wang, ndërsa disa shtete janë interpretuar nga më shumë se një stilist, duke sjellë këndvështrime të ndryshme mbi të njëjtin simbol.
Sipas organizatorëve, instalacioni synon të pasqyrojë larminë dhe krijimtarinë amerikane përmes modës, duke e shndërruar një element tradicional kombëtar në një vepër të përbashkët artistike. “Flamujt janë një kujtesë se krijimtaria dhe krijimi i gjërave të bukura janë burime të përbashkëta të krenarisë kombëtare”, është shprehur Anna Wintour.
“United Flags of Fashion” do të jetë i hapur për publikun në Rockefeller Center nga 27 korriku deri më 4 shtator 2026. Pas përfundimit të ekspozitës, flamujt pritet t’i dhurohen SCAD Museum of Art për ruajtje dhe ekspozim të mëtejshëm.